កម្មវិធីផ្ទុកមេរោគចាប់ជំរិត (Ransomware) - ភាសាខ្មែរ (Khmer)

កម្មវិធីផ្ទុកមេរោគចាប់ជំរិត គឺ ជា ឧក្រិដ្ឋកម្ម តាម អ៊ីនធឺណិត កំពុងកើនឡើងជាទូទៅ នៅ ក្នុង រដ្ឋវិចថូរៀ។ នរណាម្នាក់ក៏អាចត្រូវបានកំណត់គោលដៅបានដែរ ដូច្នេះវាជា ការសំខាន់ដើម្បីបំពាក់ខ្លួនអ្នកជាមួយនឹងព័ត៌មានទាន់សម័យ។

សូមបន្តអានដើម្បីស្វែងយល់ថាតើកម្មវិធីផ្ទុកមេរោគចាប់ជំរិតជាអ្វី របៀបជៀសវាងវា និងអ្វីខ្លះដែលត្រូវធ្វើប្រសិនបើអ្នកត្រូវបានគេកំណត់គោលដៅ។

តើកម្មវិធីផ្ទុកមេរោគចាប់ជំរិតជាអ្វី?

កម្មវិធីផ្ទុកមេរោគចាប់ជំរិតគឺជាប្រភេទ កម្មវិធីសុហ្វវែមានមេរោគព្យាបាទ (កម្មវិធីផ្ទុកមេរោគដើម្បីលួចចូលប្រព័ន្ធកុំព្យូទ័រ) ដែលត្រូវបានប្រើប្រាស់ដោយឧក្រិដ្ឋជនតាមអ៊ីនធឺណិត ដើម្បីជំរិតយកប្រាក់ពីមនុស្ស (ទទួលបានប្រាក់តាមរយៈការបង្ខំ)។

បន្ទាប់ពីកម្មវិធីផ្ទុកមេរោគចាប់ជំរិតឆ្លងចូលឧបករណ៍របស់អ្នកហើយ អ្នកនឹងមិនអាចចូលប្រើប្រាស់ឧបករណ៍ ឬឯកសាររបស់អ្នកបានទៀតទេ។ បន្ទាប់មក ឧក្រិដ្ឋជនតាមអ៊ីនធឺណិតនឹងទាមទារឱ្យអ្នកបង់ប្រាក់លោះ ដើម្បីទទួលបានសិទ្ធិចូលប្រើប្រាស់ឡើងវិញ។ ពួកគេ ថែមទាំងអាចគំរាមធ្វើឱ្យបែកចេញទិន្នន័យឯកជនរបស់អ្នក ប្រសិនបើអ្នកមិនបង់ប្រាក់លោះ។

ការបង់ថ្លៃលោះមិនធានាថាអ្នកនឹងអាចចូលប្រើប្រាស់ឡើងវិញ ឬរារាំងព័ត៌មានរបស់អ្នកពីការលក់ ឬ លេចចេញ ដោយឧក្រិដ្ឋជនតាមអ៊ីនធឺណិតនោះទេ។ ការធ្វើដូច្នេះក៏អាចធ្វើឱ្យអ្នកក្លាយជាគោលដៅកាន់តែធំសម្រាប់ការវាយប្រហារមួយផ្សេងទៀតផងដែរ។ ម ជ្ឈមណ្ឌលសន្តិសុខតាមអ៊ីនធឺណិតអូស្ត្រាលី ណែនាំថា អ្នកមិនត្រូវបង់ប្រាក់លោះដល់ឧក្រិដ្ឋជនតាមអ៊ីនធឺណិតឡើយ។

តើ វា ដំណើរការ យ៉ាង ដូចម្តេច?

កម្មវិធីផ្ទុកមេរោគចាប់ជំរិត ចូលទៅក្នុងឧបករណ៍នានារបស់អ្នក ដូចជាប្រភេទនៃកម្មវិធីផ្ទុកមេរោគដើម្បីលួចចូលប្រព័ន្ធកុំព្យូទ័រ និងមេរោគផ្សេងៗទៀតដែរ។ ឧទាហរណ៍វាអាចចូលតាមរយៈ៖

អ៊ីមែល ឬសារឥតបានការ (នៅពេលអ្នកបើកតំណ ឬឯកសារភ្ជាប់)
គេហទំព័រមានមេរោគព្យាបាទដែលអ្នកចូលមើល ដែលព្យាយាមដំឡើងកម្មវិធីផ្ទុកមេរោគចាប់ជំរិត
ភាពទន់ខ្សោយនៅក្នុងកម្មវិធីសុហ្វវែនៃឧបករណ៍របស់អ្នក
កម្មវិធីនានាដែលអ្នកបានទាញយក និងដំឡើងដែលអ្នកបានគិតថាទុកចិត្ត។

តើកម្មវិធីផ្ទុកមេរោគចាប់ជំរិតកំណត់គោលដៅទៅលើអ្នកណា?

មនុស្សជាច្រើនជឿថាពួកគេមិនចាំបាច់គិតអំពីកម្មវិធីផ្ទុកមេរោគចាប់ជំរិតទេ ពិព្រោះវាប៉ះពាល់តែក្រុមហ៊ុនធំៗប៉ុណ្ណោះ។

ជាអកុសល នរណាម្នាក់ ក៏អាចត្រូវបានគេកំណត់គោលដៅដែរ – រួមទាំងមនុស្សដូចអ្នកផងដែរ។

នោះហើយជាមូលហេតុដែលវាចាំបាច់ណាស់ក្នុងការដឹងពីរបៀបការពារការវាយប្រហារដោយកម្មវិធីផ្ទុកមេរោគចាប់ជំរិត ពីការកើតឡើងដំបូង។

តើខ្ញុំការពារការវាយប្រហារដោយកម្មវិធីផ្ទុកមេរោគចាប់ជំរិតយ៉ាងដូចម្តេច?

អនុវត្តតាមជំហានសាមញ្ញៗទាំងនេះដើម្បីការពារខ្លួនអ្នកពីការវាយប្រហារដោយកម្មវិធីផ្ទុកមេរោគចាប់ជំរិត៖

ការរក្សាឧបករណ៍ និងប្រព័ន្ធប្រតិបត្តិការកុំព្យូទ័ររបស់អ្នកឱ្យមានបច្ចុប្បន្នភាពគឺជាវិធីដ៏មានប្រសិទ្ធភាពបំផុតមួយក្នុងការទប់ស្កាត់ការវាយប្រហារដោយកម្មវិធីផ្ទុកមេរោគចាប់ជំរិត។
ការធ្វើ បច្ចុប្បន្នភាព ជួសជុលបញ្ហាសរសេរកូដណាមួយដែលត្រូវបានកំណត់អត្តសញ្ញាណ។ ការធ្វើបច្ចុប្បន្នភាពក៏ធានាថាមុខងារសន្តិសុខរបស់ប្រព័ន្ធប្រតិបត្តិការរបស់អ្នកមានបច្ចុប្បន្នភាពដែលអាចធ្វើទៅបាន។
ការនេះមានសារៈសំខាន់ ដោយសារឧក្រិដ្ឋជនតាមអ៊ីនធឺណិតអាចធ្វើអាជីវកម្មលើបញ្ហាកូដ និងមុខងារសន្តិសុខខ្សោយ ដើម្បីចម្លងមេរោគទៅឧបករណ៍ និងប្រព័ន្ធប្រតិបត្តិការរបស់អ្នក។
អ្នកអាចជៀសវាងការលំបាកក្នុងការរៀបចំការធ្វើបច្ចុប្បន្នភាពដោយជ្រើសរើសយកការធ្វើបច្ចុប្បន្នភាពដោយស្វ័យប្រវត្តិ។
ស្វែងយល់ពីរបៀបចាប់ផ្តើមនៅលើទំព័រ ការធ្វើបច្ចុប្បន្នភាពឧបករណ៍របស់អ្នក។
កម្មវិធីសុហ្វវែប្រឆាំងនឹងវីរុសត្រូវបានរចនាឡើងដើម្បីកំណត់អត្តសញ្ញាណ និងសម្អាតវីរុសណាមួយនៅលើឧបករណ៍របស់អ្នក។
ប្រសិនបើមាន សូមប្រាកដថាត្រូវបើកការការពារទល់នឹងកម្មវិធីផ្ទុកមេរោគចាប់ជំរិត។
ដូចជាឧបករណ៍ និងប្រព័ន្ធប្រតិបត្តិការរបស់អ្នកដែរ កម្មវិធីសុហ្វវែប្រឆាំងនឹងវីរុសត្រូវការធ្វើបច្ចុប្បន្នភាពជាប្រចាំ ដើម្បីដំណើរការប្រកបដោយប្រសិទ្ធភាព។
គន្លឹះសំខាន់ៗ
ប្រព័ន្ធប្រតិបត្តិការរបស់អ្នកទំនងជាបានដំឡើងកម្មវិធីសុហ្វវែប្រឆាំងនឹងវីរុសរួចហើយ។ ប្រសិនបើអ្នកចង់ជ្រើសរើសអ្នកផ្ដល់សេវា ភាគីទីបី សម្រាប់កម្មវិធីកំចាត់មេរោគរបស់អ្នក សូមប្រយ័ត្ន ពីព្រោះមានសេវាក្លែងក្លាយជាច្រើន។ គេហទំព័ររបស់មជ្ឈមណ្ឌលសន្តិសុខតាមអ៊ីនធឺណិតអូស្ត្រាលី (Australian Cyber Security Centre)(opens in a new window) ផ្តល់ការណែនាំសម្រាប់ការជ្រើសរើស និងប្រើប្រាស់កម្មវិធីសុហ្វវែប្រឆាំងនឹងវីរុស។
ម៉ាក្រូ (Macros) គឺជាស៊េរីនៃពាក្យបញ្ជាដែលធ្វើស្វ័យប្រវត្តិកម្មកិច្ចការជាប្រចាំ ឬធ្វើម្តងហើយម្តងទៀតនៅក្នុងកម្មវិធីសុហ្វវែ។ ម៉ាក្រូ (Macros) ត្រូវបានគេប្រើប្រាស់ជាទូទៅនៅក្នុង Microsoft Word និង Microsoft Excel។
ម៉ាក្រូទាំងនោះអាចមានប្រយោជន៍ ប៉ុន្តែវាក៏អាចបង្កហានិភ័យដល់សន្តិសុខផងដែរ។ ឧក្រិដ្ឋជនតាមអ៊ីនធឺណិតអាចបង្កើត 'ម៉ាក្រូមានមេរោគព្យាបាទ' ដែលជាម៉ាក្រូដែលត្រូវបានរចនាឡើងដើម្បីវាយប្រហារប្រព័ន្ធរបស់អ្នក។ ឧទាហរណ៍ ម៉ាក្រូមានមេរោគព្យាបាទអាចត្រូវបានរចនាឡើងដើម្បីបញ្ចេញកម្មវិធីផ្ទុកមេរោគចាប់ជំរិត។
ដើម្បីជៀសវាង ការប្រើប្រាស់ម៉ាក្រូដែលមានមេរោគព្យាបាទដោយអចេតនា សូមចុច 'បើកដំណើរការម៉ាក្រូ' តែនៅលើឯកសារដែលអ្នកទុកចិត្តប៉ុណ្ណោះ។
ជាឧទាហរណ៍ ចូរនិយាយថាអ្នកគ្រាន់តែចង់អានឯកសារ Microsoft Word ប៉ុណ្ណោះ។ ក្នុងករណីនេះ អ្នកមិនចាំបាច់បើកការកែសម្រួលទេ ហើយអាចរក្សាវាក្នុងទិដ្ឋភាពតែអានបានហើយ។
ចូលមើល គេហទំព័ររបស់ Microsoft ដើម្បីស្វែងយល់បន្ថែមអំពីការបិទដំណើរការ ម៉ាក្រូ។
ឧបករណ៍របស់អ្នកអាចឆ្លងមេរោគកម្មវិធីផ្ទុកមេរោគដើម្បីលួចចូលប្រព័ន្ធកុំព្យូទ័រ តាមរយៈឧបករណ៍ចល័តដែលមានមេរោគ (ដូចជា USBs) និងតំណភ្ជាប់មានមេរោគព្យាបាទ។
រក្សាសុវត្ថិភាពដោយធ្វើតាមការណែនាំទាំងនេះ៖
កុំចុចលើតំណភ្ជាប់គេហទំព័រ ឬឯកសារភ្ជាប់អ៊ីមែលដែលផ្ញើដោយនរណាម្នាក់ដែលអ្នកមិនស្គាល់។
កុំ ចុចដោយស្វ័យប្រវត្តិលើតំណភ្ជាប់ ឬឯកសារភ្ជាប់ដែលអ្នកទទួល ទោះបីជាពួកគេមកពីអ្នកដែលអ្នកស្គាល់ក៏ដោយ។ ប្រសិនបើអ្នកផ្ញើមានអាកប្បកិរិយាចម្លែក ពួកគេអាចជាឧក្រិដ្ឋជនតាមអ៊ីនធឺណិតដែលក្លែងធ្វើជាពួកគេ។ នេះត្រូវបានគេហៅថា ការវាយប្រហារបោកបញ្ឆោតតាមអ៊ីមែល។
កុំអនុញ្ញាតឱ្យរូបភាពទាញយកប្រសិនបើអ្នកទទួលបានអ៊ីមែលពីអ្នកផ្ញើដែលមិនគួរឱ្យទុកចិត្ត។
កុំទាញយកកម្មវិធីនានាពីគេហទំព័រភាគីទីបី។
កុំចុចលើការផ្សាយពាណិជ្ជកម្មដែលលោតឡើង។
កុំបើកឯកសារដែលអ្នកបានទាញយក ប្រសិនបើវាមានផ្នែកបន្ថែមឯកសារខុសពីអ្វីដែលអ្នកបានរំពឹងទុក។ ឧទាហរណ៍ ប្រសិនបើអ្នកកំពុងរង់ចាំឯកសារ MS Word ឬ PDF សូមកុំចុចលើឯកសារដែលបញ្ចប់ដោយ .exe ឬ .msi។
កុំលួចចម្លងកម្មវិធីសុហ្វវែ ពីព្រោះវាអាចនឹងមិនទទួលបានការធ្វើបច្ចុប្បន្នភាពសន្តិសុខទេ ឬវាអាចមានមេរោគព្យាបាទ។
កុំប្រើការចែករំលែកឯកសារពីម្នាក់ទៅម្នាក់ ជាធម្មតាគេស្គាល់ថាវាជា torrenting (ការទាញយកឯកសារពីឧបករណ៍របស់អ្នកប្រើប្រាស់ផ្សេងទៀតនៅលើបណ្តាញ)។ Torrenting ត្រូវបានគេប្រើសម្រាប់ការទាញយក និងចែករំលែកភាពយន្ត ឬហ្គេម។ គេហទំព័រ Torrent ត្រូវបានបង្ហាញថាផ្ទុកកម្មវិធីផ្ទុកមេរោគដើម្បីលួចចូលប្រព័ន្ធកុំព្យូទ័រ រួមទាំងកម្មវិធីផ្ទុកមេរោគចាប់ជំរិតផងដែរ ដូច្នេះអ្នកអាចទាញយក និង/ឬចែករំលែកឯកសារមានមេរោគព្យាបាទដោយអចេតនា។
កុំប្រើកម្មវិធីសហ្វវែណាមួយដែលសុំការអនុញ្ញាតហួសហេតុ ឬគួរឱ្យសង្ស័យ។
វាក៏សំខាន់ផងដែរក្នុងការ៖
ទាក់ទងបុគ្គលនោះដោយផ្ទាល់ ប្រសិនបើមានអ្វីមួយមិនត្រឹមត្រូវ។ វិធីនោះ អ្នកអាចបញ្ជាក់បានថា វាពិតជាពួកគេដែលអ្នកកំពុងនិយាយជាមួយ ហើយមិនមែននរណាម្នាក់ធ្វើក្លែងជាពួកគេនោះទេ។
ប្រើការប្រុងប្រយ័ត្ននៅពេលប្រើឧបករណ៍ចល័តពីអ្នកដទៃ
សូមពិនិត្យមើលថាកម្មវិធីសុហ្វវែត្រូវបានផលិតឡើងដោយក្រុមហ៊ុនល្បីឈ្មោះមុនពេលទាញយក និងដំឡើងនៅលើឧបករណ៍របស់អ្នក
ទាញយកកម្មវិធីពីសុហ្វវែគេហទំព័រផ្លូវការរបស់ក្រុមហ៊ុន ឬហាងកម្មវិធី app ផ្លូវការជានិច្ច។
ការបើកការផ្ទៀងផ្ទាត់ពហុកត្តា (MFA) គឺជាមធ្យោបាយដ៏មានប្រសិទ្ធភាពមួយផ្សេងទៀតក្នុងការទប់ស្កាត់ការវាយប្រហារដោយកម្មវិធីផ្ទុកមេរោគចាប់ជំរិត។ MFA គឺជាស្រទាប់សុវត្ថិភាពបន្ថែមដែលតម្រូវឱ្យអ្នកផ្ទៀងផ្ទាត់ (ឬបញ្ជាក់) តាមវិធី 2 ឬច្រើនយ៉ាង ដែលអ្នកពិតជាម្ចាស់នៃគណនីអនឡាញ។ ឧទាហរណ៍អ្នកអាចប្រើប្រាស់ពាក្យសម្ងាត់របស់អ្នកនិង លេខសម្ងាត់តែមួយដងគត់ដែលបានផ្ញើដោយអ្នកផ្តល់គណនីទៅទូរសព្ទរបស់អ្នក។
MFA អាចជួយការពារការវាយប្រហារដោយកម្មវិធីផ្ទុកមេរោគចាប់ជំរិត ដោយធ្វើឱ្យវាកាន់តែពិបាកសម្រាប់ឧក្រិដ្ឋជនតាមអ៊ីនធឺណិតដើម្បីទទួលបានសិទ្ធិចូលប្រើដំបូងទៅក្នុងឧបករណ៍ គណនី និងព័ត៌មានរបស់អ្នក។ សរុបមក ឧក្រិដ្ឋជនតាមប្រព័ន្ធអ៊ីនធឺណែត ត្រូវខិតខំប្រឹងប្រែងបន្ថែមទៀត ដើម្បីវាយប្រហារគណនីដែលការពារដោយ MFA ជាជាងគណនីដែលការពារដោយពាក្យសម្ងាត់តែមួយ។

គន្លឹះសំខាន់ៗ

ការបម្រុងទុកឯកសាររបស់អ្នកជាទៀងទាត់គឺជាវិធីមួយក្នុងចំណោមវិធីមួយចំនួនដែលអ្នកអាចចូលប្រើឯកសាររបស់អ្នកម្តងទៀតបន្ទាប់ពីការវាយប្រហារដោយកម្មវិធីផ្ទុកមេរោគចាប់ជំរិត។ ការណែនាំ ងាយស្រួលអានសម្រាប់ការថតទុករបស់យើង នឹងជួយឱ្យអ្នកចាប់ផ្តើម។

សញ្ញាការព្រមាន នៃកម្មវិធីផ្ទុកមេរោគចាប់ជំរិត

មានសញ្ញាសំខាន់ៗមួយចំនួនដែលអ្នកអាចជាជនរងគ្រោះនៃកម្មវិធីផ្ទុកមេរោគចាប់ជំរិត។ ឧទាហរណ៍៖

អ្នកទទួលបានសារលោតឡើងដែលទាមទារឱ្យអ្នកបង់ប្រាក់ដើម្បីទទួលបានឯកសាររបស់អ្នកមកវិញ

អ្នកមិនអាចចូលប្រើ ឬចូលទៅក្នុងឧបករណ៍របស់អ្នកបានទៀតទេ

ឥឡូវនេះឯកសាររបស់អ្នកត្រូវការពាក្យសម្ងាត់ ឬលេខកូដដើម្បីបើក ឬចូលប្រើឯកសារទាំងនោះ

ឯកសាររបស់អ្នកត្រូវបានផ្លាស់ទី ឈ្មោះឯកសាររបស់អ្នកត្រូវបានផ្លាស់ប្តូរ ឬ ឥឡូវ នេះ មានផ្នែកបន្ថែមឯកសារដែលប្លែក។ ឧទាហរណ៍ . ecc, . exx, .xyz, .abc, .micro, .encrypted, .locked, .crypt, .LOL!, .RDM, .0x0, .bleep, .toxcrypt ឬផ្នែកបន្ថែមមិនស្គាល់ផ្សេងទៀតដែលមានតួអក្សរចៃដន្យ។

តើខ្ញុំអាចកម្ចាត់កម្មវិធីផ្ទុកមេរោគចាប់ជំរិតដោយរបៀបណា?

ជាការណែនាំថា អ្នកមិនត្រូវបង់ប្រាក់លោះទេ។ ជាជំនួសវិញ៖

អនុវត្តតាមការណែនាំរបស់ ACSC

សូមអាន ការណែនាំលម្អិតរបស់មជ្ឈមណ្ឌលសន្តិសុខតាមអ៊ីនធឺណិតអូស្ត្រាលី (ACSC) អំពីរបៀបឆ្លើយតប ប្រសិនបើអ្នកជាជនរងគ្រោះនៃកម្មវិធីផ្ទុកមេរោគចាប់ជំរិត។

ស្វែងរកជំនួយពីអ្នកជំនាញ

វាអាចមានប្រយោជន៍ក្នុងការស្វែងរកអ្នកជំនាញផ្នែកព័ត៌មានវិទ្យាដើម្បីជួយអ្នកស្ដារឡើងវិញពីការវាយប្រហារដោយកម្មវិធីផ្ទុកមេរោគចាប់ជំរិត។

ត្រូវប្រាកដថាធ្វើការស្រាវជ្រាវរបស់អ្នក ហើយទាក់ទងក្រុមហ៊ុនល្បីឈ្មោះ។ ឧក្រិដ្ឋជនតាមអ៊ីនធឺណិតអាចក្លែងជាអ្នកជំនួយផ្នែកព័ត៌មានវិទ្យា និងទទួលបានការចូលប្រើកុំព្យូទ័ររបស់អ្នកពីចម្ងាយ។ វានឹងធ្វើឱ្យខូចខាតដល់ឧបករណ៍ និងឯកសាររបស់អ្នកកាន់តែច្រើន។

គន្លឹះមួយចំនួនដើម្បីការពារគណនីរបស់អ្នក

កម្មវិធីផ្ទុកមេរោគចាប់ជំរិត អាចបណ្តាលឱ្យព័ត៌មានសំខាន់បំផុតរបស់អ្នកងាយរងគ្រោះ។ សូមចងចាំគន្លឹះទាំងនេះសម្រាប់ការពារគណនីរបស់អ្នកបន្ទាប់ពីការឆ្លងមេរោគពីកម្មវិធីផ្ទុកមេរោគចាប់ជំរិត៖

ប្រើប្រាស់ឧបករណ៍ផ្សេង (មិនមានឆ្លងមេរោគ) ដើម្បី ផ្លាស់ប្តូរពាក្យសម្ងាត់ សម្រាប់គណនីសំខាន់បំផុតរបស់អ្នក។

បើក ការផ្ទៀងផ្ទាត់ពហុកត្តា (MFA)

ត្រូវប្រុងប្រយ័ត្ន ការឆបោកប្រាស់ដែលអាចកើតមាន

ប្រសិនបើអ្នកសង្ស័យថាការឆ្លងមេរោគពីកម្មវិធីផ្ទុកមេរោគចាប់ជំរិត បានធ្វើឱ្យឯកសារអត្តសញ្ញាណ ឬព័ត៌មានហិរញ្ញវត្ថុរបស់អ្នកងាយរងគ្រោះ សូមស្វែងយល់ ពីអ្វីដែលត្រូវធ្វើបន្ទាប់ពីការលេចចេញព័ត៌មាន។

តើខ្ញុំរាយការណ៍ពីកម្មវិធីផ្ទុកមេរោគចាប់ជំរិតយ៉ាងដូចម្តេច?

អ្នកអាចរាយការណ៍ដោយសុវត្ថិភាពអំពីកម្មវិធីផ្ទុកមេរោគចាប់ជំរិត (ក៏ដូចជាឧក្រិដ្ឋកម្មតាមអ៊ីនធឺណិតផ្សេងទៀត) ទៅ ReportCyber(opens in a new window)។

របាយការណ៍របស់អ្នកនឹងត្រូវបានបញ្ជូនបន្តដោយផ្ទាល់ទៅកាន់ទីភ្នាក់ងារអនុវត្តច្បាប់ដែលពាក់ព័ន្ធ។

តាមរយៈការធ្វើរបាយការណ៍ អ្នកនឹងផ្តល់ព័ត៌មានសំខាន់ៗ ដើម្បីជួយកំណត់គោលដៅឧក្រិដ្ឋជនតាមអ៊ីនធឺណិត។ អ្នកក៏នឹងជួយធ្វើឱ្យការប្រើប្រាស់តាមអនឡាញកាន់តែមានសុវត្ថិភាពថែមទៀតសម្រាប់ប្រជាជនអូស្ត្រាលីទាំងអស់។

Safety & emergencies

Updated 20 September 2024