A'oga fa'ata'ita'i, lea e ta'ua fo'i o le 'kinder' poo a'oga amata' o se vaega tāua o le atia'eina ma le a'oa'oina o lou alo. O le lesitalaina o lou alo i se polokalame a le a'oga fa'ata'ita'i mo le lua tausaga e mafai ona fesoasoani e atia'e a latou tomai ina ia manuia le olaga ma le a'oga.
Itula o a'oga fa'ata'ita'i:
O polokalame mo le Tolu-Tausaga-le Matua e mo le va i le 5 i le 15 itula e vaiaso ta'itasi ma polokalame mo le Fa-Tausaga-le Matua e mo le 15 itula.
I'uga fa'amaonia:
O tamaiti o lo'o o i polokalame a a'oga fa'ata'ita'i ua amata ona atia'e tomai e pei o le faitau ma iloa numera ma mata'itusi, ma pe fa'apefea ona tali fesili. O le a tuputupu le mautinoa ma le tuto'atasi o lou alo i le a'oga fa'ata'ita'i ma a'oa'o tomai o le aga feso'ota'i ma lagona. O le a mafuta atu ma isi ma maua ni latou uo fou.
O su'esu'ega ua iloa ai i le 16 tausaga. o tamaiti a'oga na auai i le lua pe 3 tausaga o se polokalame a a'oga fa'ata'ita'i a'o le'i amata i a'oga e maualuluga atu a latou togi i le Igilisi ma le numera nai lo tamaiti e le'i auai.
Fa'apefea ona galulue fa'atasi mātua ma faia'oga i a'oga faata'ita'i:
O a'oga fa'ata'ita'i e sili lona aogā o se faiga fa'apa'aga i le va o mātua/e o lo'o tausia, aīga ma faia'oga. I le avea ai o se matua/e o lo'o tausia, o oe le vaega pito sili ona tāua i le atia'eina o lou alo. E te a'oa'o i a i latou i le sa'o ma le sese, o lau gagana, aganu'u ma measina e pei o le agalelei ma le fa'aaloalo. O le a talanoa atu faia'oga e fa'atatau i mea o lo'o tutupu i le a'oga fa'ata'ita'i ma auala e fesoasoani i lou alo e fa'a'au'au ai le a'oa'oina i le fale. E latou te fia iloa mea e fiafia ai lou alo ma auala e fiafia e a'oa'oina ai.
E mafai ona e talosaga i le faia'oga a lau a'oga fa'ata'ita'i e fa'atonu se fa'amatala'upu i so'o se taimi. E mafai lea i le fa'afesaga'i pe auala i le telefoni po'o le vitio. E leai se totogi o iai mo aiga i le mauaina o lenei auaunaga.
O a mea e fai i le a'oga fa'ata'ita'i:
E fa'amalosiau faia'oga i tamaiti e a'oa'o e ala i ta'aloga. O gaioiga e ono aofia ai tusiga ata, pese, a'e, eliina ma le tamomo'e i fafo, ta'aalo i mea ta'alo ma faitau tusi. O ta'aloga e fa'amalosiau ai tamaiti e fa'aaoga o latou mafaufauga ma mea e maua, a'o faifai mea fa'atasi ma isi e ala i le fa'asoa ma fetufaa'i. O le a a'oa'o tamaiti e fa'atatau i leo, upu ma le gagana, e aofia ai le a'oa'o ona tautala ma malamalama i le Igilisi.
O a'oga fa'ata'ita'i o se vaega o aganu'u eseese i tatou nu'u:
O polokalame a a'oga fa'ata'ita'i e talia mātua mai tupuaga uma e avea ma vaega o latou nu'u. E iai le nofoaga e mafai ona feiloa'i ai mātua ma fefa'asoaa'i ai tala ma malamalama ai le isi i le isi.
E fia iloa e faia'oga lou alo ma lau aganu'u. E fesoasoani lea ia i latou e saunia polokalame e a'anoa mo lou alo, e aofia ai gaioiga e fa'avae i aso o aganu'u ma mea tutupu ma fa'amanatu le felanulanua'i o aganu'u i Vitoria.
E fa'aaofia e faia'oga tagata uma i mea e fai, ina ia maua e tamaiti e lē tautala i le Igilisi le avanoa tutusa e ta'aalo ai ma a'oa'o e pei o isi. O nisi polokalame a a'oga faata'ita'i e iai faia'oga e tautala i gagana e lua e fesoasoani i tamaiti e vaivai le tautala po'o le leai o se Igilisi. E a'oa'o fo'i tamaiti ina ia fealofani, alofa ma fa'aaloalo i aganu'u eseese a isi.
Ituaiga o poloakalama a a'oga fa'ata'ita'i
E mafai e tamaiti ona auai i se polokalame a A'oga Fa'ata'ita'i-mo le Tolu-Tausaga i se nofoaga e vaaia ai tamaiti (e ta'ua fo'i o le nofoaga e tausi ai tamaiti) po'o se auaunaga a'oga fa'ata'ita'i tuto'atasi (lea e ta'ua fo'i e fai vaega). O ia auaunaga e masani ona ofoina ai fo'i le polokalame a le Fa-Tausaga-le Matua a a'oga fa'ata'ita'i.
O se laumua e tausi ai tamaiti e mafai ona ofoina le aso atoa o a'oa'oga ma le tausiga, aofia ai le polokalame a a'oga fa'ata'ita'i. O le polokalame a le a'oga fa'ata'ita'i e ta'ita'ia e le faia'oga e mafai ona tu'ufa'atasi ma itulā fa'aopopo o a'oa'oga ma le tausiga.
I auaunaga tuto'atasi, o se polokalame a le a'oga fa'ata'ita'i o le a na ona fa'atino i aso fa'apitoa ma taimi fa'atulagaina. O se auaunga tuto'atasi e masani ona fa'agaioina mo le 40 vaiaso i le tausaga i le taimi o a'e a'oga ma ave aso malolo i le taimi e tasi ma a'oga. O nei aso ma itulā e fa'ata'atitia e le auaunaga a a'oga fa'ata'ita'i.
Updated